Юж 32 раз – з 18 по 20 липня 2014 рока — розпалиме символічний оген Лемківской ватри. В Ждини, лем собі відомим ритмом, зас буде бити серце лемківской культури. Фурт думаме, як догодити Гостям Ватри, як спростати Вашим культурно-музичним сподіваням. Дбаме, жеби триднева програма Ватри вмістила якнайширший контекст культуровий нашой громади, єй богатсво, розмаіття, шануєме специфіку каждого лемківского села чи бесіду даного реґіону Карпат. Лем не легко тото вшитко зробити в 72 години.
В програмі Ватри не забракне концертів, варштатів, авторских спіткань чи простору для наймолодших. Вкрили-зме для Вас фрагмент ватряного неба велич повалом, што дост значущо змінят інфраструктуру об’єкту Лемківской ватри.
На музичній сцені Ватри переплітатся давнє з найсучаснійшим, то ту родятся нови хіти, джінґлі… и фоторгафії до родинних лемківских альбомів. Кєд би то лем фестіваль, а то ищи едукація, інтеграція, вимір трансграничний, познавчий, суспільний и релігійний. Ту родится культура, нови єй прояви, новий стиль и мода. В тим живим людским конґльомераті по роках однаходятся призабити обличчя, а з вчерашнього ворога – надійний товариш.
Жичиме Вам, жеби Вас на Ватрі нич не боліво, но хибаль же ноги од гуляня!
На XXXII ждиньскій сцені виступлят:
– лемківский фольклор представлят, м.ін.: ансамбль пісні и танцю „Руский Керестур” зо Сербії, Ансамбль пісні и танцю „Лемковина” зо Львова, Лемківский ансамбль пісні и танцю „Кичера” з Лігници, ансамбль пісні и танцю „Карпат’янин” з Прешова, хор „Зор’я” з Устя Руского, фольклорний ансамбль „Студенька” з Калуша, фольклорний ансамбль „Розтока” з Рудной, вокальний колектив „Яворина” з Дрогобича, обряди вкаже „Словинка” зо Словинок,
– медже нима дітячи: ансамбль пісні и танцю „Козаки Поділля” з Хмельницкого, „Лемківский перстеник” з Ґладишова, „Ручай” з Маластова, „Лемчатко” з Калуша, „Галицки візерунки” з Чорткова, „Словиночка” зо Словинок, хор „Роса” з Устя Руского,
– в програмі Лемківской ватри виступлят тіж: ансамбль Львівской фільгармонії „Високий Замок”, ансамбль пісні и танцю „Аркан” з Перемишля, танцювальний ансамбль „Горицвіт” – IV ЛО в Лігници, вокальний колектив „Крайка” з Перемишля, народний колектив „Ряшів’ян” з Решова, Софія Федина зо Львова.
– а rock-фольково попідмітуют Вами: „Los Colorados” з Тернополя, „The Vyo” з Києва, „Надія” з Лєшна Вижнього, „Lemko-Tower” зо Стрільців Краєньских, „308” з Ужгорода, „Слов’яни” з Кракова,
– но и што важливе, даде посередині Ватри „Міс Лемковини”!
В програмі авторских спіткань призримеся:
– Епіфану Дровнякови – Никифорови – Ян Тшупек, Йоанна Земанек, Ґжеґож Штвєртня
– „Ruś Krosnieńska” – Себастіан Дубіель-Дмитришин
– “Historia Łemków. Od średniowiecza do czasów współczesnych” и “Działania Wojska Polskiego w południowo-wschodniej Polsce, w świetle tajnych raportów wywiadu czechosłowackiego” – Богдан Гальчак
– Соціологічно-етнографічний панель присвячений тотожности лемків.
Ватру супроводят тіж:
– XX. Лемківска спартакіада
змаганя з пилами, косами чи повереслами
– конкурс „Міс Лемковини”
– VII. Ватрочка для наймолодших
– артистични и музични акції на „Lemko-Street”
– простір для молодих лемківских подруж „Моя Родина”
– з’їзд абсольвентів Лігницкого україньского ліцею
– ювілеї, річниці
– фільми, вистави, презентації
Цне ся Лемковині за Вами !!!